БААТАРАЛАР СУОЛУ, ГААҺЫ ТУРУОРУСТУЛАР

Сыымах бөһүөлэгэр отчуокка 70-ча киһи муһунна. Баатара нэһилиэгин суолун-ииһин тупсарыыга 400-тэн тахса мөлүйүөн солкуобайдаах суолу оҥоруу үлэтэ 2021 сылтан саҕаланарын эттилэр.


Сахалартан бастакы Сэбиэскэй Сойуус дьоруойа Федор Попов 2021 сылга төрөөбүтэ 100 сылыгар аналлаах өрөспүүбүлүкэтээҕи хамыыһыйа тэриллибитин туһунан сыымахтар биир дойдулаахтара, тыа хаһаайыстыбатын миниистирин бастакы солбуйааччы Татьяна Осипова сырдатта. Үүт туттарыы, тыа хаһаайыстыбатын бырагыраамаларын, тутуу, электро-уот, гаас ситимин тардыыны, 2 бырыһыаннаах ипотека мэхэниисимнэрин ыйыттылар. 2024 сылга диэри гаастааһын бырагыраамата киллэриллибэккэ турар.

Нэһилиэккэ кэпэрэтииби тэрийиини, сайылыкка электро-уот ситимин тардыыны, 120 миэстэлээх хотону тутууга санааларын эттилэр. Биэнсийэлээх Иван Ходулов Федор Попов пааматынньыгын боруонсаттан оҥорторууну, кини туһунан ыччакка үйэтитиини аныгылыы ньыманан тобулары туруоруста. Дириэктэр Геннадий Макаров кадеттар олорор интэринээттэрин туттарыыны, өрөспүүбүлүкэ өттүттэн кадет хамсааһыныгар сүрүннүүр сокуону таһаарарга санаатын эттэ. Иннокентий Корякин подстанция тутуутун, Сыымахтан Өргөннөөххө диэри уот ситимин саҥардыыны туруоруста.