Хаҥалас улууһун тыатын хаһаайыстыбатын туруу үлэһиттэрэ бу күннэргэ бурдугу, оҕуруот аһын, сүөһү аһылыга буолар үүнээйини ыһан, хортуоппуйу олордон улахан үлэни үмүрүттүлэр.

Хаҥалас улууһун үрдүнэн уопсайа 4543 гектар иэннээх сиргэ ыһыы үлэтэ ыытылынна. Манна барыта 68 тыраахтар, 16 сиэйэлкэ, 15 хортуоппуй олордор тэрил, 8 оҕуруот аһын олордор сиэйэлкэ, 30 сири оҥорор тэриллэри (культиватордар уонна булууктар) үлэлэттилэр уонна 183 үлэһит кыттыыны ыллылар. Туораахтаах култуураны (сэлиэһинэй, нэчимиэн, эбиэс) быйылгы сылга 1532 гектар былааннаахтарыттан 1540 гаа сиргэ ыһан былааны аһара толордулар. Ол иһигэр, сэлиэһинэйи – 370, 2 гектарга, нэчимиэни – 339, 1 уонна эбиэһи – 830, 8 гаа сиргэ ыстылар.

Хаһаайыстыбаларынан көрөр буоллахха, улууска үс бурдук үүннэриитинэн дьарыктанар хаһаайыстыба баар. Р.М.Куприянов салайааччылаах “Хачыкаат” ТПХК – 1188 гектары, Е.С.Денисова салайааччылаах хаһаайыстыба Үрүҥ Баска 327 гектар сиргэ уонна П.П.Охлопкова салайааччылаах “Наука” ХЭТ Селекционнайга туораахтаах култуураны ыһан үрдүк көрдөрүүнү ситистилэр.

Сүөһү аһылыгар анаан, эбиэһи ыһыы үлэлэрэ өссө түмүктэнэ иликтэр. 2806, 7 гектар сиргэ ыһар былааннаахтар. Бүгүҥҥү күннээҕи туругунан 2 187 гектар сиргэ ыһылынна, ол эбэтэр былааны 77, 9 % толорон иһэллэр.

887 гектар сиргэ паардааһын үлэтэ барар. Хортуоппуй олордуутугар былаан туолбата, 89 % тэҥнэстэ. Ол эбэтэр, былаан 775 гектар 690 гаа иэннээх сиргэ олортулар, бу салааҕа үлэ түмүктэннэ. Былаан туолбатах сүрүн биричиинэтинэн инники сылларга, “Нөмүгү агрофирма”, билиҥҥитинэн “Экоферма Туймаада” 70 гектар сиргэ хортуоппуй олордор эбит буоллаҕына, тэрийээччилэрэ “Туймаада ҮАПК” былырыын мунньахтааннар хортуоппуйу уонна оҕуруот аһын олордуутуттан, ону сэргэ бурдук ыһыытыттан аккаастаммыттара буолар. Кинилэр сүрүн хайысхаларын сүөһү иитиитигэр туһаайбыттар. Ол быһыытынан сүөһү аһылыгын сиилэһи, сенаһы бэлэмнээһиҥҥэ күүскэ ылсыбыттар.

Оҕуруот аһын ыһыыга былаан 92, 9% туолла, 126,4 гектар олордулунна. Ол иһигэр хаппыыстаны – 38, 15 гааҕа, моркуобу – 38,94 гектарга, сүбүөкүлэни – 25,4 уонна атын култууралары 23,95 гааҕа олортулар.

Ааптар: Уйбаан УЙГУУРАП.