Мэҥэ Хаҥаласка сыллааҕы үлэ түмүгүн таһаарыы

Бу сыл кулун тутар 21 күннүгэр Аллараа Бэстээх культурнай киинигэр, тыа хаһаайыстыбатын 2018 сыл үлэ түмүгүн отчуоттуур тэрээһин буолла. Тэрээһини улуус тыатын хаһаайыстыбатын управленията сыл ахсын көҕүлээн, иилээн-саҕалаан ыытар.

Биһиги тэрилтэбит үлэһиттэрэ Розалия Гуляева уонна Лилия Моедо тэрээһиҥҥэ көхтөөх кыттыыны ыллылар. Мэҥэ–Хаҥалас улууһун бааһынай хаһаайыстыбаларыгар, тыа хаһаайыстыбатын специалистарыгар, кооператив салайааччыларыгар  уонна биирдиилээн  дьоҥҥо анаан семинар ыытыллынна.  2019 сылга тыа хаһаайыстыбатын өйүүр судаарыстыбаттан көрүллэр көмөлөрү сырдатылар, кооперациялааһыны сөптөөхтүк тэрийии уонна үлэлэтии туһунан кэпсэтии таҕыста. Кыттааччылар тыа хаһаайыстыбатын эйгэтигэр сыьыаннаах араас хабааннаах боппуруостарга хоруйдарын ыллылар.

Дьоккуускай куораттан Россельхозбанк үлэһитэ Саргылана Седалищева тыа хаһаайыстыбатын  чэпчэтиилээх кредитын (5%) туһунан сырдатта, кэккэ боппуруостарга эппиэттээтэ. Ол курдук, программа 3 сыл үлэлээбитин тухары чэпчэтиилээх кредиты туһаммыт дьон ахсаана аҕыйаҕын, кредит ылааһын историята мөлтөҕүттэн сылтаан үгүс киһи бастакы этаапка сыыллан хаалаллар эбит.

Тэрээһин иккис чааһыгар улуус тыа хаһаайыстыбатын управлениятын салайааччыта Иннокентий Семенов 2018 сыл үлэ түмүктэрин билиһиннэрдэ, бастыҥ көрдөрүүлээх хаһаайыстыбаларга наҕараада туттарыллынна. Олохтоох табаары оҥорооччулар атыы-эргиэн дьаарбаҥкатын тэрийдилэр.

Мэҥэ-Хаҥаласка маннык, тыа хаһаайыстыбатын үлэтин түмүктүүр тэрээһин сылын ахсын үрдүк таһымнаахтык ыытыллар. Тыа хаһаайыстыбатынан дьарыктанааччыларга болҕомто ууруллара хайҕаллаах суол.