ТЫА СИРИН ИПОТЕКАТА ОЛОХХО КЭЛИМНИК КИИРЭР

Тыа сиригэр дьиэ-уот туттан олохсуйарга билигин араас кыах баар. Ол курдук “Тыа сирин кэлимник сайыннарыы” федеральнай бырагырааманан быйылгыттан чэпчэтиилээх кирэдьиит бэриллэр буолла. “Тыа сирин ипотеката” бырагыраама Уһук Илин эрэгийиэни хабар.


Амма улууһун киинин хабайар хаба ортотугар Ленин уулуссатыгар баар уопсай дьиэ 22-с  кыбартыырата саҥа хаһаайыннанна. Дьячковскайдар бу иннинэ Промкомбинат бөһүөлэгэр чааһынай дьиэлээхтэрэ. Ити эрээри үлэлииргэ-үөрэнэргэ табыгастаах  диэн улуус киинигэр икки хостоох кыбартыыраны ыларга соруммуттар. Хата  “Тыа сирин ипотеката” тосхолунунан   чэпчэтиилээх кирэдьиити уон сыл болдьоххо биэрэн, санаалара туолбут.  Хайыы-үйэ кырааскалаан, сууйан-сотон, миэбэллэрин олоҕун булларан, көһөн  киирээри тэринэллэр.

Ирина Дьячковская кэпсээбитинэн, кини дьиҥэр бырагыраама саҕаланаатын кытта докумуонун хомуйан биэрбит. Ону хамсык тардан, арыый уһаабыт, ол түмүгэр иккистээн докумуонун туттаран, ыам ыйыгар кирэдьиит дуогабарыгар Россельхозбааны кытта илии баттаһар. Оттон үгүөрү үбү-харчыны  2 бырыһыаҥҥа иэс биэрии – “Тыа сирин кэлимник сайыннарыы”  федеральнай тосхол  биир сорҕото. Киһи бэлиэтиирэ диэн, кирэдьиит суумата  муҥутаан биэс мөлүйүөҥҥэ диэри буолар. Ону тэҥэ 21-тэн 71 саастаах дьоҥҥо кытары  биэрэллэр. Баҕалаах киһи баҕар куоракка да регистрациялаах буолуон сөп, ити гынан баран дьиэтин хайаан да тыа сиригэр туттар  эбэтэр иккис ырыынактан атыылаһар диэн усулуобуйулаах.

Өссө биири тоһоҕолоотоххо, бу тосхолунан   отут тыһыынчаттан аҕыйах нэһилиэнньэлээх  сиргэ  дьиэни, кыбартыыраны ылыахха, оҥотторуохха сөп. Ол аата Дьокуускайга, Мииринэйгэ, Нерюнгрига көҥүллэммэт. Аны туран чааһынай дьиэни  хайаан да биригээдэ тутан биэриэхтээх. Баҕар ити да иһин буолуо, кирэдьиити ылбыт дьон 44 бырыһыана харчыларын дьиэ туттарга туһаммыттар, 56 бырыһыана кыбартыыра ыларга диэн  сөбүлэҥ түһэрсибит. Ол аата кулун тутартан саҕалаан Россельхозбаан Саха сиринээҕи салаатыгар  877 сайаапка киирдэ, итинтэн 233 бигэргэннэ. Барыта 165 мөлүйүөн суумалаах   71 кирэдьиит бэрилиннэ.

Билигин Уһук Илин эрэгийиэҥҥэ сайдыы балысханнык баран эрэр. Ол иһигэр Саха сирин улуустарыгар, нэһилиэктэригэр дьон дьиэни балай эмэ туттар, оҥостор буолла. Онуоха Тыа сирин ипотеката тосхолу өссө кэҥэтэр соруктаах олоххо киирэр.

Екатерина Аммосова.