Выбрать страницу

 

“Туймаада” агрохолдинг АУо хаһаайыстыбалара ыччат сүөһүнү ыалларга туох-хайдах усулуобуйаҕа ииттэрэ биэрэллэрий? Бу туһунан Агрохолдинг тыа хаһаайыстыбатын үлэтин сүрүннүүр управлениетын салайааччыта Андрей Ноговицынныын кэпсэтэн, дьон-сэргэ билэн туһанарыгар көмөлөөх маннык түгэннэри бэлиэтэммиппин билиһиннэрэбин.

Аҥаардас баҕа санаанан салайтарар тутах. Сүөһү ииттиэн баҕалаах ыал онно сөп түбэһэр хотонноох уонна толору хааччынар оттуур сирдээх буолуохтаах. Исписэлиистэр ону үөрэтэн-көрөн баран, сөптөөх усулуобуйа тэриллибитин бигэргэттэхтэринэ эрэ дуогабар түһэрсиллэр. Бааһынай хаһаайыстыбалар, эдэр пиэримэрдэр эмиэ маннык бырагырааманы туһанан сүөһүлэниэхтэрин сөп эбит. Агрохолдинг салалтата хаһаайыстыбаларын хаҥатыахтарын баҕалаах эдэр, эрчимнээх дьоннуун бииргэ үлэлэһэргэ бэлэм.

Андрей Тимофеевич быһааран кэпсээбитинэн, улаатыннарыыга уонна төлөһүтүүгэ анаан быйылгы төрүөх ньирэйдэри биэрэллэр. Иллэрээ сыл ньирэйдэри сайыҥҥы ыйдарга улаатыннарыыга, былырыын күһүн борооскулары кыстыкка көрүүгэ биэрбит буоллахтарына, быйыл саас ыам-бэс ыйдарыттан саҕалаан эһиил күһүн алтынньыга диэри (1,5 сылга) болдьохтоон, бырагырааманы кэҥэтэн биэрбиттэр итиэннэ ааспыт сыллааҕы усулуобуйа 50 х 50 эбит буоллаҕына, быйылгыны ыччат сүөһүнү иитэ ылааччы туһатыгар 60 х 40 гына улаатыннаран биэрбиттэр.

Ол эбэтэр быһаччы көнөтүнэн өйдөөтөххө, икки ыйдаах 10 ньирэйи көрө-харайа ылбыт ыал (бааһынай хаһаайыстыба) балтараа сылынан 4-дүн атыылаабыт (ииттэрэ биэрбит) хаһаайыстыбаҕа төннөрөр, бэйэтигэр 6 сүөһүнү хаалларар, онтуттан төһөтүн иитэрин, идэһэлэнэрин бэйэтэ быһаарар. Маны таһынан бириэмийэ көрүллэр: хаһаайыстыбаҕа туттарыллар сүөһү 300-тэн 350 киилэҕэ диэри төлөһүтүллэр түгэнигэр хас биир киилэ эбиллиигэ 50 солкуобайынан ааҕан, харчынан төлөбүр оҥоһуллар. Холобур, тыыннаах ыйааһынынан 330 киилэлээҕи туттардаххына, 30 киилэ эбии ыйааһыҥҥар бириэмийэтин төлөбүрэ – 1,5 тыһ. солкуобай. Оттон 350 киилэттэн таҕыстаҕына, төлөбүрэ икки төгүл үрдүү түһэр. Холобур, төлөһүппүт сүөһүҥ 365 киилэни үктээтэҕинэ, 300 киилэттэн саҕалаан хас эбиллибит киилэтигэр 1 мөһөөҕүнэн суоттанан, 65 киилэ эбии ыйааһыҥҥа 6,5 тыһ. солкуобай төлөнөр.

Ыччат сүөһүнү көрүүгэ ылбыт ыал (хаһаайыстыба) отун-аһын барытын бэйэтин суотугар хааччыйар. Аны сүөһү сүтэр эбэтэр оһоллонор-өлөр түбэлтэтигэр иитэ ылааччы хоромньутун эмиэ бэйэтэ уйунар. Улаатыннарыыга-төлөһүтүүгэ ылыллыбыт ыччат сүөһү ый ахсын ыйааһыннаныахтааҕа булгуччу ирдэнэр. Онон бүтэһик ыйааһыҥҥа төһөнү үктээбитинэн көрөн,атыылаабыт хаһаайыстыбаҕа төлүөхтээх. Сүөһүнү тиэйэн илдьиини-аҕалыыны ким уйунарый эбэтэр ороскуотун аҥаардаһаллар дуу? Бу уонна атын да өрүттэр мөккүөр тахсыбат, өйдөспөт быһыы-майгы үөскээбэт гына дуогабарга сиһилии чопчуланыах кэриҥнээхтэр.

“Өлүөхүмэ кыладабыайа” ХЭУо Өлүөхүмэ куораттан чугас Үҥкүргэ уонна Каландаришвилига турар 172 оҕус, “Победа” ХЭУо (Таатта, Боробул) 85 оҕус уонна 85 тыһы, “Новай” сопхуос” АУо (Мииринэй) 100 оҕус уонна тыһы, “Бөртө сылгы собуота” ХЭУо (Хаҥалас, Улахан Аан) 150 оҕус, “Туймаада” эко-пиэримэ ХЭУо Дьокуускай Мархатыгар уонна Хаҥалас Нөмүгүтүгэр баар пиэримэлэриттэн 240 оҕус, барыта холбоон 832 ньирэйи иитиигэ биэрэллэр. Үлэ ыам ыйыттан саҕаланаары турар. Оттон суол быстарыктаах сирдэргэ өрүс суола арылыннаҕына бэс ыйыгар ылыахтарын сөп. Сүөһүлэниэн баҕалаах элбэх. Сайаапка киирэ турар. Сайаапкалаахтар истэригэр 100 ньирэйгэ тиийэ ылыан баҕалаах эдэр пиэримэрдэр бааллар үһү.

Андрей Ноговицын бигэргэтэринэн, бу бырайыак икки өрүккэ иккиэннэригэр барыстаах буолуоҕа. Ким даҕаны баттаммат. Сүөһүнү ньирэйиттэн саҕалаан төрүөх ылыахха диэри иитэргэ элбэх сыра, ороскуот эрэйиллэрин тыа хаһаайыстыбатыгар сыһыаннаах киһи барыта билэр. Биир үтүө күн “босхо” хас даҕаны ньирэйдэнэн хааларын, ама, ким сириэй.

Ист.: Улус Медиа

       
       
Посмотреть на карте Якутска
close-link
Мы используем cookie файлы. Пользуясь сайтом, вы соглашаетесь с нашей Политикой конфиденциальности