Вячеслав Соколов Мэҥэ Хаҥалас улууһун 2-с Наахара нэһилиэгин фермэрэ. Санатан эттэххэ, Өрөспүүбүлүкэтээҕи «Аҕа күрэҕин» 3 төгүллээх чемпиона, бойобуой дьайыылар кыттыылаахтара, спорду өрө туппут, үлэттэн толлубат киһи.
2018 сыллаахха Тыа хаһаайыстыбатын министиэристибэтин иһинэн ыытыллар «Саҥа саҕалааччы фермэр» конкурска кыттан гран ылбыта. Кини сүрүн сыала-соруга сүөһүнү элбэтии. Грант үбүгэр 8 сүөһүнү, кууннаах беларусь тыраахтыры уонна бородууксуйатын таһарга УАЗ-фермэр атыыласпыт.
Бастаан саҕалыырыгар 18 төбөлөөх этэ, билигин уопсайа 56 төбөлөөх, ол иһиттэн ыанар ынаҕа 25. Үүккэ 30 туонна дуогабардаах.
Вячеслав Соколов сүөһүнү иитиигэ сүрүн болҕомтотун – сүөһү аһылыгын бэлэмнээһиҥҥэ уурар. «Эбии аһылык баар буоллаҕына, сүөһү да элбиир. Сүөһү элбээтэҕинэ, аһылыкпыт да элбиир буоллаҕа» — диэн бэлиэтиир. Олохтоох дьаһалта гран ылбытыгар, бааһына сирин туһаҕа таһаар диэн биэрбит. Онон сүөһү аһылыгар диэн ыһыынан дьарыктаммыта 4 сыла.


Быйыл 10 га иэннээх сиргэ эбиэс ыспыт. Кэмигэр, сиигин көтүппэккэ ыһан, эбиэс үүнүүтэ үчүгэй диир. Бу күннэргэ 150 урулуону хомуйбуттар. Былырыын 10 туоннаны ылбыттар, быйыл быһа холуйан, 30 туонна эбиэс диэххэ сөп буолуо. Быйыл бэркэ үүммүт. Урулуоннар маассаларын 90 бырыһыанын ылар.
Күнү-дьылы баттаһа бааһынаҕа «Беларуһунан» Вячеслав бэйэтэ урулуоннуур, онтон хомуйууга эргэ «Синтайынан» Сергей Никифоров уонна уола Сокол Соколов үлэлии сылдьаллар.
Аны туран, бааһына кытыытыгар элбэх сыллаах оту ыспыт. Быйыл онтон 45 урулуону ылбыт.
Бастаан граҥҥа киирсэригэр улуус көмөтүнэн фреза ылбыт. Эһиилгиттэн 7 гаалаах бааһынаны сөхсүтэр баҕалаах. Бурдугун сиэмэтин ылынарыгар ороскуоту толуйуу өттүнэн улуус управлениета көмөлөспүт. Эһиил саҥа сиэйэлкэ ылыан баҕарар.
«Былырыын оппут тиийбэккэ, 40 туонна оту оттообуппут, өрүскэ үстэ киирэ сылдьыбыппыт, быйыл «дьыл от өттүгэр мөлтөх» да буоллар, Кутту үүнүүтүнэн сүөһүгэ тиийэр аһылыгы холкутук булуннубут»,- диэн үөрэр.
Бастаан саҕалыырга, биллэн туран, ыарахан диир. Ол эрэн үлэлээн-хамсаан киирэн бардахха, үлэҥ түмүктээх буоллаҕына тыа хаһаайыстыбатын управлениета, салалта, олохтоох дьаһалта көмөлөһөр, өйүүр. Уонна тыа хаһаайстыбатын министиэристибэтин иһинэн араас программалар бааллара улахан көмө буолар диэн бэлиэтиир фермер Вячеслав Соколов.

       
       
Посмотреть на карте Якутска
close-link
Мы используем cookie файлы. Пользуясь сайтом, вы соглашаетесь с нашей Политикой конфиденциальности