Бүлүү улууһун бааһынай хаһаайыстыбаларын сүбэ мунньаҕа буолан ааста

Кулун тутар 29 күнүгэр биһиги нэһилиэкпитигэр Бүлүү улууһун бааһынай хаһаайыстыбаларын сүбэ мунньаҕа буолан ааста. Бу түмсүүгэ Тыа хаһаайыстыбатын министерствотын субэлиир информационнай киинин эксперт специалиһа, биллиилээх ыанньыксыт, Полярная Звезда орден кавалера Шарин Павел Петрович, улуус тыа хаһаайыстыбатын  департаменын салайааччыта Павел Павлович, улуус бааһынайдарын түмсүүтүн салайаачччыта Варвара Михайловна Гаврильева, тыа хаһаайыстыбатын специалистара, бааһынай хаһаайыстыба салайааччылара, үлэһиттэрэ барыта 50 тахса киһи кыттыыны ыллылар.

Түмсүү сүрүн соругунан Россия фермердарын сьеһин делегата, Россия утуөлээх фермера, Саха Республикатын тыатын хаһаайыстыбатын үтүөлээх улэһитэ Анастасия Васильевна Кырбасова хаһаайыстыбатын, базатын , үлэтин улуус фермердарыгар билиһиннэрии, опытын атастаһыы буолар.

Программа быһыытынан кэлбит ыалдьыттар эбиэккэ дылы Кэнэрэччигэ Анастасия Васильевна базатын көрдүлэр, үлэни-хамнаһы  билистилэр.

Эбиэт кэннэ Ырыа Дыгыйар аатынан норуот айымньытын дьиэтигэр Бүлүү улууһугар бааһынай хаһаайыстыба сайдыыта диэн темаҕа төгүрүк остуол , санаа атастаһыыта буолла.

Тыл эппит ыалдьыттар бааһынай хаһаайыстыба сайдыытыгар санааларын эттилэр, үлэлэрин билиһиннэрдилэр, баар кыһалҕаларын этиннилэр. Бааһынайдар Анастасия Васильевна базатын көрөн, сөҕөн – сөбүлээн бардылар. «Киинтэн ыраах тыа сиригэр кыахтаах хаһаайыстыбаны тэриниэххэ сөбун уу харахпытынан көрөн итэҕэйдибит» – диэтилэр.

Төгүрүк остуол бүтүүтүгэр бастыҥ бааһынай хаһаайыстыбаларга наҕараада туттарыыта буолла.

Анастасия Васильевнаҕа улуус тыатын хаһаайыстыбатын сайдыытыгар, Кыргыдай нэһилиэгин сайдыытыгар үтүөтүн иһин бочуоттаах бэлиэнэн наҕараадаланна.

Петров Федор Афанасьевич сыралаах үлэтэ Бочуотунай грамотанан бэлиэтэннэ.

Бүлүү улууһугар бааһынайдар бастакы түмсүүлэрэ Кыргыдай нэһилиэгэр буолбута бэйэтэ туспа үөрүүлээх түгэн, Анастасия Васильевна үлэтин үтүө тумүгэ буолар.

Түмүккэ сахалыы сандалы тула мустан эҕэрдэ этилиннэ, ырыа – тойук дьиэрэйдэ.

Бу улахан түмсүүну ыытарга көмөлөспут бар дьоммутугар, оскуола, детсад коллективтарыгар, түөлбэ салайааччыларыгар, женкомитетка, Ырыа Дыгыйар аатынан норуот айымньытын дьиэтин үлэһиттэригэр барҕа махталбытын тиэрдэбит. Ыалдьыттарбыт астынан, махтал тылларын этэн тарҕастылар. Куруутун даҕаны маннык түмүстэхпитинэ туох барыта табыллыан сөп.

Этэнҥэ буолун, бар дьоммут!

К. Мискяев, Кыргыдай нэһилиэгин баһылыгын солбуйааччыта.