ЧҮҮЙЭЛЭР ТЫА ХАҺААЙЫСТЫБАТЫН БОППУРУОСТАРЫН ТААРЫЙДЫЛАР

Мэҥэ Хаҥалас Ходоро нэһилиэгэр бырабыыталыстыба отчуотугар электро-уот ситимэ быйыл чуолкай оҥоһулларын туһунан СӨ тыа хаһаайыстыбатын миниистирин бастакы солбуйааччы Татьяна Осипова сырдатан, олохтоохтору үөртэ.


Чүүйэлэр электро-уокка, гааска төлөбүр ыараан иһэрин, култуура киинэ хаарбах туруктааҕын, аҕыйах ахсааннаах үөрэнээччилээх оскуолалар инники дьылҕаларын, национальнай бырайыак чэрчитинэн оскуолаҕа үлэлэри ыытыы, сүөһүнү сиэмэлээһин, тыа хаһаайыстыбатын исписэлиистэрин үлэлээх буолууларын, бэтэринээрдэр хамнастарын, учаастакка баар саҥа тэриллибит бааһынай хаһаайыстыбаҕа электро-уоту киллэрии тустарынан о.д.а. ыйытыыларга хоруйдары ыллылар.

Олохтоох дьаһалта аатыттан бөһүөлэк иһинэн ааһар өрөспүүбүлүкэтээҕи суолга туруоруллар “лежачий полицейский” бэлиэни оҥорууну, биллэр судаарыстыбаннай диэйэтэл Филипп Гаврильевич Охлопков аатынан саҥа кыбаарталга гаастааһын ситимин тардыыны, Хатыҥнаах учаастагын СИП кабельга көһөртөрүү итиэннэ биэлсэр ыстаатын көрдөрүү боппуруостарын туруордулар. Сергей Романов сүөһүгэ 35 тыһыынча солкуобай таһынан үүт сыанатын үрдэтиини, плем холбоһугу өйөөһүнү, Аркадий Дмитриев саха ынаҕын көрүллүүтүн хайысхатын уларытарга, тупсарарга, үрэҕи туоруур муостаны тутууну эттилэр.