НЬУРБА УЛУУҺУН ЫАЛЛАРА СҮӨҺҮ БААЙДАНАЛЛАРЫГАР ДЬОҺУН ОЛУК УУРУЛУННА

Дойдубут Президенэ Владимир Путин нэһилиэнньэ пандемияттан улахан оҕустарыыта суох тахсарын туһугар чөлгө түһүү саҥа стандартарын олохтоото. Оттон «Ньурба оройуона» МО дьаһалтата коронавирус инфекцията бүрүүкээтин кытта олохтоох дьон сэмэй дохуоттаах араҥатыгар, социальнай көмүскэл быһыытынан «Күндээдэ» агрофирмалыын сүбэлэһэн өйөбүл быһыытынан 100 төбө саҥа төрүөх ньирэйи босхо түҥэтэргэ быһаарыы ылыммыттара. Бу күннэргэ сорох нэһилиэктэргэ ньирэйдэр хайыы-үйэ тиийдилэр. Онон үөрүү-көтүү үрдээтэ.


Иван Александрович Иванов– 4 оҕолоох Акана олохтооҕо:

– Элбэх оҕолоох буоламмыт хайдах гынан сүөһүлэнэбит дии сырыттахпытына дьаһалта сайаапкалары хомуйбутугар хамыыһыйаны ааһаммыт буор босхо ньирэйдэннибит, сүөһү төрдө оҥоруохпут. Бэйэ хаамар баайа суох тыаҕа олордоххо уустук. Дьиҥэр, ис санаабытыгар билиҥҥи кэмҥэ, хайдах сүөһүнү босхо түҥэтэллэрий диэн сөхпүппүт баара кыларыйар кырдьык буолла. Ол иһин оройуон салалтатыгар, «Кундээдэ» агрофирмаҕа маннык улахан өйөбүл-көмө иһин махтанабыт.

Максим Нестерович – 5 оҕолоох Үөдэй ыала:

– «Ойуурдаах куобах охтубат, дьонноох киһи тутайбат» диэн өс хоһоонун эт бэйэбитинэн биллибит. Мин санаабар Ньурба оройуонун бюджета, «Кундээдэ» АО да үбэ-харчыта байҕалга тэҥнээх буолбатаҕа чуолкай. Дьаҥынан сылтаан былааннамматах ороскуот бөҕө тахсыбытын үрдүнэн салалта боростуой үлэһит дьоҥҥо бу курдук көмө илиитин ууммута республикаҕа аҕыйах буолуон сөп. Биһиэхэ 5 ыал ньирэйдэннэ, идэһэҕэ туттубаппыт, сүөһү гынабыт дииллэр. Биир өттүнэн аны атын хааннаах сүөһү кэлэн хороҕор муостаахтарбыт туруктара, боруодалара тупсуоҕа.

Елена Саввинова – Хатыы нэһилиэгин дьаһалтата:

– Биһиэхэ 8 сайаапка киирдэ, хамыыһыйа 5 ыалы аһардыбыта. Нэһилиэнньэҕэ биһиэхэ биэрбэтилэр диэн хос саҥа суох, төттөрүтүн, маннык күчүмэҕэй күннэргэ 100 төбө ньирэйи босхо дьиҥ-чахчы кэскиллээҕи эрэ көрөр салалта биэрэр диэн толкуйдаахтар. Онон хатыылар ааттарыттан барҕа махтал буоллун. Биэс дьоммут бары элбэх оҕолоохтор, ньирэйдэри улаатыннаран сүөһү баайы тэнитиэхпит дэһэллэр.

Лилия Алексеева – Таркаайы нэһилиэгин дьаһалтатын тыа хаһаайыстыбатын специалиһа:

– Хатыҥ сыһыылар, киирэптэр 5 ньирэйгэ тиксэннэр үөрүүлэрэ муҥура суох улахан. Үөрүөхпүт иһин, сүөһү ииттиэн баҕалаахтарга эдэрдэр элбээн иһэллэр, урут наар кырдьаҕастар эрэ этэ дии. Мин толкуйбар, оройуоҥҥа сүөһү төбөтүн ахсаана түспэтигэр оройуон салалтата, «Күндээдэ» агрофирма дьоһун олугу уурдулар. Мантан тирэнэн эдэр ыаллар сүөһүлэнэн элбэтэ олоруохтара, ол да иһин биһиги дьоммут бу көмөнү-өйөбүлү олус сыаналаатылар уонна салалта үлэтигэр ситиһиилэри баҕардылар.

Ааптар: Афанасий Иванов