Петр Гоголев бэрэссэдээтэллээх норуодунай дьокутааттар тыа хаһаайыстыбатынан дьарыктанааччылары өйүүр сокуоҥҥа саҥа уларыйыылары киллэрэри ылыннылар. СӨ Ил Түмэнин сиргэ-уокка уонна тыа сиригэр бэлиитикэтин олохтоох кэмитиэтин бэрэссэдээтэлэ Андрей Находкин иһитиннэрбитинэн, уопсайа 9 уларыйыы киирбит: ол иһигэр өссө даҕаны чочуллар 6 уларыйыыны профильнай кэмитиэт, 3 уларыйыыны “Кырдьыктаах Арассыыйа” политическай баартыйа киллэрбиттэр.
Санатар буоллахха, өрөспүүбүлүкэ Ил Дархана Айсен Николаев Саха сирин Бырабыыталыстыбатыгар туруорбут соруктарын толороругар, 2021 сылтан сүөһүнү, сылгыны иитээччилэргэ биир ынах, биэ төбөтүгэр уонна үүккэ көмө харчынан уларыйыылар киирдилэр. Барыллааһынынан, үүт туттарааччыларга көмө харчыны судаарыстыба бүддьүөтэ көрдөҕүнэ 50 солкуобайга диэри үрдүөн сөп. Кэтэх хаһаайыстыбалаахтар сүөһү төбөтүгэр 35 тыһыынча солкуобай көмө харчы ылар буолуохтара. 2021 сылга көрүллэр көмөҕө маннык ирдэбил олохтонно: – үүтү туттарыыга туонната 50 тыһыынча солкуобай буолла (2020 сылга туоннатыгар 35 тыһ.солк.); – хотугу уонна бырамыысыланнай оройуоннарга сүөһүнү иитэр тэрээһиннээх хаһаайыстыбаларга ынах төбөтүгэр 35 тыһыынча солкуобай (2020 сылга 30 тыһ. солк.); – сибиинньэ иитээччилэри өйүүргэ, тыһы сибиинньэ биир төбөтүгэр 12 тыһыынча солкуобай (2020-ҕэ 12 915 солк.); – сылгы үөрүн иитэр тэрээһиннээх хаһаайыстыбаларга биэ төбөтүгэр 1,5 тыһыынча солкуобай (2020 сылга оччо этэ); – хортуоппуйу олордооччулары өйүүргэ гектарыгар 23,295 солкуобай (2020 сыллааҕынан хаалла); – сиргэ олордуллар оҕуруот аһынан дьарыктанааччылары өйүүргэ гектарыгар 34,685 солкуобай (2020 сыллааҕынан хаалла); – туораахтаах култуураны ыһыынан дьарыгырар хаһаайыстыбалары өйүүргэ 1 гектарыгар 10,000 солкуобай. 2022 сылтан маннык көмөлөр көрүллүөхтэрэ: сүөһү уонна сылгы этин соҕотуопкалыыры, үүнээйини үүннэрэн (хортуоппуйу, сиргэ олордуллар оҕуруот аһын, бурдугу) соҕотуопкалааччылары өйүөхтэрэ. Итиэннэ бурдук ыһааччылар өйөнүөхтэрэ – 1 гектары ыһыыга 10 тыһ. солкуобай 2020 с. СӨ тыатын хаһаайыстыбатын министиэристибэтин тус үбүттэн көрүллүө. Маны тэҥэ 2022 сылтан көмө кээмэйин үрдэтиигэ маннык этиилэр киирдилэр: – Сылгы үөрүн иитэр тэрээһиннээх хаһаайыстыбалары өйүүргэ биэ төбөтүгэр 25 тыһыынча солкуобайга диэри үрдэтии; – хортуоппуйу олордооччуларга көмө кээмэйин 1 гектарыгар 35 тыһ. солк. диэри үрдэтии; – сиргэ олордуллар оҕуруот аһынан дьарыктанааччылары өйүүргэ 1 гектарыгар 25 тыһ. солк. диэри үрдэтии; – сүөһү этин соҕотуопкалыырга туоннатын 70 тыһыынча солкуобай диэн олохтуурга; – сылгы этин соҕотуопкалыырга туоннатын 55 тыһ. солкуобай диэн олохтуурга; – бурдугу соҕотуопкалыырга туоннатын 13 тыһ. солк. өйүүргэ; – хортуоппуйу уонна сиргэ олордуллар оҕуруот аһын соҕотуопкалыырга туоннатын 10 тыһ. солк. өйүүргэ. РФ Бүддьүөтүн Кодексын 140 ыстатыйатынан ылыллыбыт бырайыагы олоххо киллэрэргэ СӨ Бырабыыталыстыбата уураах таһаарыа.

Подробнее: https://ulus.media/2020/12/16/2021-syltan-tya-ha-aajystybatygar-tuoh-ularyjyylar-kiireller/

       
       
Посмотреть на карте Якутска
close-link
Мы используем cookie файлы. Пользуясь сайтом, вы соглашаетесь с нашей Политикой конфиденциальности